O portavoz do Grupo Popular, Pedro Puy, anunciou hoxe que o deputado Miguel Ángel Santalices Viera é a persoa que este grupo parlamentario apoia para ocupar a vicepresidencia primeira da Mesa do Parlamento galego, en substitución do recén nomeado presidente da Deputación de Ourense, José Manuel Baltar. Puy felicitou publicamente ao conselleiro de Economía e Industria, Javier Guerra, “polo seu éxito na adhesión de PYMAR ao convenio de Vulcano permitindo a viabilidade deste estaleiro”, o que motivou a retirada dunha proposición non de lei presentada polo Grupo do BNG e que sería debatida no pleno que comeza mañá.