Alberto Sueiro considera que, malia que as cifras “seguen sen admitir análises triunfalistas porque continúa a haber moitos galegos sen traballo”, o mantemento do diferencial positivo con España “indica que traballamos no camiño correcto”

O PPdeG SALIENTA QUE OS DATOS DO PARO DE FEBREIRO AMOSAN QUE A CAÍDA DO EMPREGO REDUCIUSE Á METADE RESPECTO AO MESMO PERÍODO DE 2009

• O portavoz de Traballo do Grupo Popular destaca que o aumento do 1,1 por cento do paro en Galicia con respecto a xaneiro, fronte ao 2,03 que sube en España, “desminte o falso argumento da oposición de que a media da nosa Comunidade é superior á do Estado”.

Santiago, 2 de marzo de 2010.- O Partido Popular de Galicia salienta como “apunte esperanzador, dentro dunha situación que aínda require de todos os esforzos” o feito de que os datos do paro de febreiro amosen que a caída do emprego reduciuse á metade respecto ao mesmo período de 2009. Así, mentres o desemprego medrou en 5.254 persoas entre xaneiro e febreiro do pasado ano, a variación entre eses dous mesmos meses baixou en 2010 a 2.543.

O portavoz de Traballo do Grupo Parlamentario Popular, Alberto Sueiro, subliña que, “aínda que as noticias seguirán sendo malas mentres haxa parados”, o dato de que Galicia, cunha suba do 1,1 por cento, é a segunda comunidade autónoma onde menos aumenta o paro neste período e a terceira en termos interanuais (cun aumento do 13,36 por cento respecto a febreiro de 2009), indica “que algo se está a facer ben na loita contra o que segue a ser o principal problema dos galegos”.

Alberto Sueiro considera que, malia que as cifras “seguen sen admitir análises triunfalistas porque continúa a haber moitos galegos sen traballo”, o mantemento do diferencial positivo con España “indica que traballamos no camiño correcto”. Así, aínda que os datos “non poden mover ao entusiasmo”, si demostran, para o deputado, “que en Galicia se está a abordar o problema con seriedade e con todo o esforzo que require, desde unha visión realista da situación” e, en todo caso, “ao que moven é a seguir traballando aínda máis para avanzar ata resolvelo”.

O portavoz de Traballo do Grupo Popular destaca que o aumento do 1,1 por cento do paro en Galicia con respecto a xaneiro, fronte ao 2,03 que sube en España, “desminte o falso argumento da oposición de que a media da nosa Comunidade é superior á do Estado”.

Compartir en: