O presidente do Goberno galego, que visitou este mediodía o operativo de busca, asegura que se está facendo “todo o que tecnicamente é posible” para localizar aos desaparecidos

FEIJÓO DESTACA O “ACTO HEROICO” DOS POLICÍAS NA PRAIA CORUÑESA DO ORZÁN E AGRADECE O TRABALLO DOS EFECTIVOS QUE PARTICIPAN NA BUSCA DOS DESAPARECIDOS

• “Estamos a disposición das familias e dos amigos do falecido e dos desaparecidos”, asevera

• Explica que recibiu unha chamada do presidente do Goberno para trasladar as condolencias a todo o pobo galego, ás familias e “para trasladar o compromiso do Goberno de que seguiremos traballando coordinadamente o Concello da Coruña, a Xunta e o Goberno de España para atopar ás persoas desaparecidas”

• Agradece, en nome do Goberno galego e dos galegos, “as mostras de solidariedade que estamos recibindo do resto de España”

A Coruña, 27 de xaneiro de 2012.- O presidente da Xunta, Alberto Núñez Feijóo, destacou, este mediodía, o “acto heroico” do policía morto e dos dous policías desaparecidos, esta madrugada na praia coruñesa do Orzán, e agradeceu o traballo dos efectivos que están a participar na busca. 

“Os policías fixeron un acto heroico de servizo público”, salientou ao que engadiu que se está facendo “todo o que tecnicamente é posible” para localizar aos desaparecidos. “Hai –resaltou- cen persoas no dispositivo: dispositivo aéreo, dispositivo terrestre e dispositivo por mar”. 

Despois de lamentar esta “tráxica desgraza”, o responsable autonómico agradeceu, tamén, o comportamento dos familiares, “a enteireza que están mostrando”. “Estamos a disposición das familias e dos amigos do falecido e dos desaparecidos”, aseverou. 

Así mesmo, Feijóo, que visitou este mediodía o operativo de busca, explicou que recibiu unha chamada do presidente do Goberno, Mariano Rajoy, para trasladar as condolencias a todo o pobo galego, ás familias e “para trasladar, tamén, o compromiso do Goberno de España de que seguiremos traballando coordinadamente o Concello da Coruña, a Xunta de Galicia e o Goberno de España para atopar ás persoas desaparecidas”. 

Por último, o titular da Xunta quixo agradecer, en nome do Goberno galego e dos galegos, “as mostras de solidariedade que estamos recibindo do resto de España”.

Compartir en: